Meeting terubah SEC SDNU

Komiti Besai SDNU benung ngatur meeting pemansang SDNU ka taun 2007-2010. Aum sida iya di buka di Bintulu. Nitih ka berita, tu meh aum terubah SEC SDNU di atur di luar Kuching kenyau ari penumbuh SDNU 51 taun nyin kelia. Ngelama tu semua aum SEC ba indu opis SDNU di Kuching.

Sebedau sida baum, sida iya bisi ngatur randau ngagai bala kaban SDNU di Bintulu. Aum SEC di Bintulu tu di atur Chairman SDNU Bintulu, En. James Stephen. Ba randau nya, semua bala komiti besai SDNU di pinta bejaku awak ka di kelala bala ti bisi datai.

Ba randau nya, pekara ti berat di pejurai iya nya baka langgor program SDNU ka taun 2008 - 2009, ba senentang Education, culture, welfare, Economy, business, networking

Publicity Aum SEC SDNU di Bintulu

Mr President benung ngadu ka sekeda pekara ti deka di kerandau

Sekeda Komiti Besai SDNU maya Pre Council Meeting


Kaban Komiti ari Sibu, Cr Chambai Lindong serta En. Augustine Merikan baru rijista


President SDNU En.Mengga Mikui benung mantai ka rangkal pengawa ti deka di gaga dalam taun 2008 - 2010

En. Lubon Tigong, orang bumai di Bintulu ti terubah mujur ngepun ka pengawa dagang belalau ka hasil bumai betupi ngena chara dagang


Bala kaban komiti begulai enggau bala kaban SDNU Bintulu ti bisi ngulu randau pagi nya


Raban SEC SDNU benung berjurai ka program serta pengawa ti deka di atur SDNU

Misi Niki Mt Kinabalu Siri 2

Hari Ketiga 20.12.2007

Niki Mt kinabalu, tu meh batang tuju pejalai kami menyanak ke Sabah. Sigi lama udah dalam runding janji enggau Enduq, Watt serta Anggat, awak ka nyadi pun pengerasing sida iya ba peresa pom 5, pom 3 serta pom 2.

Mupuk ari rumah Unggal Johnny kira pukul 8.00 pagi, ngenatai ka diri ba Kinabalu Park kira jam 9.45 udah nya. Amat enggau penuh pengeransing mega ba anak mata Enduq, Watt serta Anggat, laban ba sida tu meh terubah ngagai Mt Kinabalu.

Ba aku, terubah nemuai ngagai kaki Mt Kinabalu dalam taun 1992 maya ngulu International Scout Jamboree di Tambunan. Udah nya kali kedua ngagai Mt Kinabalu lalu niki datai ba tuchung dalam taun 2002 suba. Nyangka setegal ti kala meda gambar-gambar aku ba tuchung Kinabalu meh ngepun ka sida tiga bisi penemu minta ulu niki Mt Kinablu, taja pan aku empu udah semaya "no second time" niki Mt Kinabalu pengudah 2002 suba.

Ransing amat, baru datai ba mua opis kaki Mt Kinabalu Park sebedau ngerista nama ba Sutera Sanctuary Lodges enggau Kinabalu Park Office

Permit niki Mt Kinabalu ari Sabah Park Office


Pejalai kami udah dipun ngena sembiang minta berkat, pengelikun, pengering tubuh enggau pengerai

Pengeransing makin betambah deka niki Mt Kinabalu taja endur nya udah berasai chelap. Enduq, Watt serta Anggat enggau penuh pengeliat serta pengandal udah nyebut leka sembiang baru nyingkang limpas ari gate ba Timpohon Check-point terubah.

Nya yaaaa, pejalai 6.5 km nuju Laban Rata bedau bagi lima, tang udah haaa haaaaa!!!



Langkau alai ngetu ninting 1 km

Baru sampai di Laban Rata jam 8.30 malam, mula munyi keroncong udah nya nyau poco poco. Ngorder nasi goreng 3 pinggai, enda ga ulih abis nadai selera kelalu lelak. Akai daaiii sepinggai nasi goreng RM15.00, ai panas segelas RM1.00. Ehmm nasib bisi mai milo 3 in 1, enti enda, terbai baru ga RM6.00 kena ngemanas ka batang rekung ngena segelas milo.

Hari Keempat 21.12.2007

Akai dai, kami enda ulih nitih ka orang bukai niki ngagai tuchung kena tumu pagi 21.12.2007 hari siti, udah kelalu lelak niki nggagai Laban Rata. Nitih ka jaku Guide, kami menyanak meh ngaga rekod meleka ari Timpohon jam 10.45 pagi tang datai ba Laban Rata jam 8.30 malam, ha ha ha nya mina ba rekod iya aja kini? Rekod ba Sabah Park pegai Guides bukai, nyangka kena tinggang ujan, nyau basah, nadai ulih bacha agi !!!!

Ari setegal bangat lelak niki serta laun datai ba Sutera Lodges Sanctuary di Laban Rata, nya alai kami diau semalam da ba tengah bukit. Bilik ba Sutera Lodges fully booked, kami lalu pindah ngagai Kinabalu Gold Resorts Rest House di Panar Laban kira 10 min pejalai niki ke atas.

Hostel ba Panar Laban, nadai heater nya alai bayar RM120.00 (RM3o.00/head) banding ka RM200.oo semalam ba Sutera Lodges ti meruan heater ba bilik tang semina on ari jam 7.00 lemai ngagai jam 2.00 pagi aja. Heater nya pan automatic control, selepas jam 2.00 pagi balat ga penyelap ba bilik nya. Taja nadai header tang rest house ba Panar Laban bisi nyali dapur gas, periuk mangkuk, kettle, capak, sudu serta gelas.

Udah ke pindah ngagai Panar Laban, kami menyanak endang nadai pengawa bukai, mina makai tinduk nat ka pengelelak ari pagi sampai ke malam. Semina pansut sekejap sekejap sekeliling rest house tambah ka ujan enggau kabus tebal.

Nama deh, tak makai tinduk aja meh kami menyanak se hari nya. Perut lapar nadai tusah, laban bisi mai packet mee, packet rice, milo 2 in 1, coffee 2 in 1, tea 2 in 1 serta can food.

Sebedau tinduk baru lemai, kira jam 8.00 semua pemakai udah ga ready ke di empa jam 2.00 pagi, tang semina ngangat ka iya aja.

Enduq seduai Watt ba mua Restaurant di Laban Rata


Sutera Lodges Sanctuary Hotel peda ari Panar Laban


Enduq, Watt serta Anggat pansut meda pemanah rampa menua ari Rest House ba Panar Laban


Enduq seduai Dad berdiri tisi Rest House di Panar Laban, kami menyanak sama nat ka diri sepanjanjai hari laban pah enggau betis asai kena tenchang


Garing-garing atas katil, pengawa kami sepanjai hari nganti ke makai enggau jam ke chukup.

Tampung tu: Siri 3 - Ngerembai ka Pua Kumbu ba Tuchung Kinabalu

Misi Niki Mt Kinabalu Siri 1

Setuju ka endur di lawa

Kenyau ari pun taun 2007 tu tadi, udah berunding deka mindah tau ka matau menua kena meri peransang serta pengeransing ka sida Enduq, Watt enggau Anggat mansang ba pelajar sekula sida iya. Nya alai pengelama udah berunding, sida tiga pan setuju dalam bulan 5, deka "bediri ba Tuchung Mt Kinabalu ngerembai ka Pua Kumbu".

Ari sida tiga setuju ka niki Mt Kinabalu, kami lalu booked flight Airasia ka tubuh 4 kena 14/5/2007, nasib mega kena tambang murah, semina RM839.92 pulai mansang Kuching ke Kota Kinabalu. Tu meh terubah ngena Airasia ari Kuching ke Kota Kinabalu, ngenyadi ka belanja ngena tambang jauh lebih murah enti di banding ka enggau MAS.

Nama deh, penuh semanggat serta nadai sabar mega Enduq, Watt enggau Anggat nganti 18/12/2007, hari mupuk ke Kota Kinabalu. Dalam pengelama nya semua utai di guna naka ulih begiga, baka baju tebal, stokin tebal, sarung jari tebal, sleeping bag, kasut serta bag sesuai kena ke bukit.

Watt lebih agi ransing, udah ngemas diri enggau videocam serta nyedia ka memory sticks ke chukup. Bag iya lebih sebulan udah di kemas, enggai ka bisi utai di guna nyau kurang tau ka tinggal.

Datai bulan dua belas, peresa pom 5 udah mega belalu, kira chukup besedia mega sida tiga, ni enda Mt Kinabalu, bukit ti pemadu tinggi di Pulau Borneo serta Asia Tenggara, 4095.2m. Kena ngering ka tubuh diri, lemai hari sida jogging bela ngansak pangan diri, kelimpah ari nya kala mega niki gunung Singai kena nambah ka penguat.

Nasib kami menyanak manah, laban bisi Unggal Johnny di lawa lalu ulih ngulu ka bejalai kin kia maya hari datai enggau hari ke dua di Sabah. Terima kasih ka Unggal Johnny serta sida sebilik ti diau ba siti Kampung di Jalan Kiulu Tamparuli, ti berat amat ka kami menyanak sekumbang di Sabah sampai ka kami mulai ka diri ke Kuching kena 23.12.2007.

Unggal Johnny tu bala kitai datai ari Temuduk Sri Aman tang bebini jadi enggau indu Dusun kenyau ari 1990 suba. Ia mega tau kumbai kitai, Iban ti chukup berjaya diau di menua orang ba pengawa dagang, kontrak enggau plantation.

Berangkat ari Kuching ke Kota Kinabalu 18.12.2007

Fiffy meri bye-bye ngagai Enduq, Watt serta Anggat ba KIA

Watt, Anggat serta Enduq terubah ngena Airasia datai di Kota Kinabalu Sabah

Ba Airport KKIA, Enduq ngambi brochures, nadai sabar deka nemu enggau silik Mt Kinabalu, lebih agi deka meda bunga Rafflesia ti selalu di sebut orang kin kia

Map Sabah, sekeda alai deka ti di tuju

Hari Kedua 19.12.2007

Lebuh di Sabah ba hari ke dua, kami menyanak bisi peluang di bai Unggal Johnny raun ngagai sekeda pasar ti selalu amat di dinga, baka Pasar Tamparuli, Pasar Kota Belud, Pasar Kota Marudu serta Matunggong.

Selama tu aku tak semina ninga ari bala petunggal ti kala pegi "driver lipan" di menua Kota Belud enggau Kota Marudu, tang diatu diri empu udah datai din ngulu ka sida Enduq, Watt enggau Anggat di bai Unggal Johnny.

Ukai semina nya aja, Unggal Johnny mega mai kami menyanak ngabas sekeda projek iya ba Kilang Sawit Matunggong sebedau kami nuju rumah panjai bansa Rungus.

Rumah panjai Rungus nya agi baka rumah panjai asal kelia, taja pan diatu di gaga alai "Homestay Programme". Nadai mega ngadang, program Hari Christmas ari Sabah ti pansut ba RTM1 kena pagi 26.12.2007, udah di "shooting" ba rumah panjai nya, YB Datuk Dr Maximus Ongkili ti nyadi MP menua nya mega bisi dalam program TV nya.

Rumah Unggal Johnny, alai kami menyanak bemalam 18 & 19.12.2007. Endur rumah iya tu amat strategic di atas bukit lalu di keliling kebun buah, numbas penyelap maya lemai tau ka malam.

Watt ba tisi kereta Uncle Johnny maya ngetu di Simpang Kota Marudu


Apaienduq begulai enggau Unggal Johnny maya ngetu ba gerai Simpang Kota Marudu enggau Matunggong

Kilang sawit di Kota Marudu, alai sekeda lori Unggal Johnny ngangkut buah

Anggat ba mua penatai rumah panjai bansa Runggus di Matunggong Kota Marudu

Watt, Anggat serta Enduq benung milih gelang jari, rantai, key chains ba rumah panjai bansa Rungus


Anggat nerima rantai gaga ari buah kayu ka tanda pengingat

Siti kedai ba Kota Belud, ti ngasuh Anggat lalu nanya aku munyi tu "Apuuu Dad, bisi Iban ngedai ditu pia?" Aku pan asai terubah iya meda nama kedai ti munyi nya, tang nadai ga terpikir nya kedai Iban. Emm mayuh pejalai mayuh ga utai ti nyelai kena pansa.


Raun ke Kota Marudu


Ha ha haaa tu meh Jambatan Gantung Tamparuli, di baruh nyin jalai kereta kurang 1m ari atas ai, enti sungai bah jambatan nya pan tenggelam


Ngambi peluang niti Jambatan Tamparuli ti amat tebilang ba lagu niang John Gaisah dalam jaku Kadazan/Dusun enda jauh ari pasar Tamparuli

Pengawa di pansa Ujung Minggu

1. Seminar Ke2 Dayak abad ke 21

Bala raban Dayak Iban kira 100 tubuh, udah ngulu siti Seminar Pemansang Dayak Abad ke 21 ba siti hotel di Kuching kena 16.12.2007 ari pukul 8.00 pagi nyentuk pukul 6.00 lemai. Pengawa tu di atur siko orang dagang kitai Iban ti bepalan di Kuala Lumpur, Dr. John Brian, lalu di bantu Mr. Joseph Tawie.

Dr John Brian, Dr. Dusit Jaul, Dr. Ellie Luhat serta En. Lugon Tigong ti nyadi speaker, mantai ka kertas kerja ba seminar nya. Ngalih ka lemai workshop ngiga penemu bala mayuh jalai ngemansang ka Dayak di menua pesisir ba Abad ke 21 mega bisi di atur.

Dr John Brian manding ka gelas kosong enggau runding anak kitai ke agi biak

Presiden SDNU, En. Mengga Mikui madah ka SDNU setuju ngatur Seminar ke dudi ila

Pn. Maria mega ngenatai ka penemu ba seminar nya ngari ka bala indu

Sekeda bala ti ngulu Seminar sehari nya

Dr. John Brian nerima bup "The Broken Shield" ari En. Josph Tawie

Sekeda bala mayuh ti sama ngulu Seminar

2. Sarawak Dayak Graduate Association (SDGA) ngatur AGM

Gerempung Dayak ke graduate udah mujur ngatur Miting ninting taun ba siti hotel di Kuching kena 15.12.2007. Dr Joseph Jawa Kendawang, siko pemesai perintah ti gawa ba opis Kampong udah kena pilih nyadi Presiden baru SDGA nganti Professor Dr. Dimbab Ngidang. Gerempung tu udah ti tumbuh dalam taun 2003 suba.

Presiden baru SDGA, Dr. Joseph Jawa meri tanda pengingat ngagai Professor Dimbab lalu di kemata ka En. Baru Bian

Bala raban komiti baru SDGA

Sekeda kaban SDGA begambar begulai enggau Raban Komiti baru

3. SDNU Kerjasama SADIA ngupas Pendam

Kena pagi 15.12.2007 tu tadi, terubah iya SDNU ngupas pendam lama ba Jalai Chawan Kuching. Nitih ka rekod ari gereja Anglika, pendam tu udah di kena bala Iban ti ngembuan pengarap lama kenyau ari 170 taun kelia.

Miring kena mungkal pengawa ngupas pendam, di perati ka Presiden SDNU En. Mengga Mikui serta Presiden SADIA En. Sidi Munan

Bala mayuh ti bisi datai taja pan ujan, agi nganti pengawa miring tembu


Bala ti bisi kaban belayan ti udah di tumbak ba pendam benung ngerijista nama kaban ti mati


President SDNU mungkal nebas ngena pito lalu di kemata ka bala tuai-tuai piring enggau tuai pengatur pengawa En. William Langgong serta En. Sidi Munan


Sekeda rumah ti nadai pemendar ba tanah pendam SDNU


Sekeda rumah ti nadai pemendar ba tanah SDNU

Rumah nadai pemendar ba tanah SDNU berimbai enggau pendam

Workshop ti nadai pemendar mega ba tanah SDNU

Sekeda bala ti datai ngena peluang ngintu pendam kaban belayan ti udah lesi