Temuai

free link to home study courses guide
Online home study courses guide.

Sunday, August 31, 2008

Makai Serumpu gaga ati ka Dr. Robert Menua

Ngenatai ka pengaga ati ngagai nuan Dr. Robert Menua Salleh, laban ti udah bulih PHD ari UNIMAS tu tadi. Pengaga ati mega ninga berita, nuan meh Dayak ti terubah bulih PHD ari UNIMAS kenyau ari UNIMAS udah di tumbuh kira 12 taun ti udah.

Makai serumpu di atur SDGA ti betuai ka Mr. Jona udah mujur amat lalu tau di tampung baru maya dudi awak ke nyadi alai bala kaban SDGA berandau ka mayuh bengkah pekara ti tau meri penguntung ka semua kaban. Kira bisi 40 tubuh bala kaban SDGA bisi ngenatai ka diri makai serumpu malam nya.

Kelimpah ari jaku randau, bala mayuh mega bisi di perindang pangan diri enggau lagu karaoke sereta ngajat ngena sape. MC malam nya Mr. Phillip Tero, minta bala mayuh betesau datai enti sema agi bisi beserumpu baru jemah ila.



Dr. & Mrs Robert Menua begulai enggau Dr. & Mrs Ellie Luhat


President SDNU Mr. Mengga Mikui ngulu ka bala mayuh nyeradak ai basa ngagai Dr. Robert Menua


Prof Dimbab begulai enggau Mr. Mikai Mandau seduai Mr. Anthony Banyan



Dr. Alex Sayok begulai enggau Mr. Helbert Ubong seduai Terrence Temenggong


Mr. Utap Sebau, Mr. Elley Lawai, Mr. Nelson Brandah sereta Mr. Anthony Banyan


Dr. Robert Menua nerima pemberi ari Mr. Jasmy Sadan lalu di kemata Mr. Jona



Monday, August 25, 2008

Tunang "Antara Bansa"

Rami Betunang



Ngenatai ka pengaga ati ngagai Igat Hillary seduai Endun Melis, laban seduai udah sepenemu deka numbuh ka siti bilik baru, ngujung ka seduai ngangau ka bala tuai ngemata ka seduai betunang.

Agi kandang ka diatu, Igat Hillary gawa di Kapit, lalu Endun Melis gawa ba Wisma Bapa Malaysia di Petra Jaya Kuching nitih ka periuk diri empu. Taja pia, gaya amat jauh tang di pelaba ka seduai semampai begulai ba HP. Jauh diatu, ukai nyadi ka penanggul, lama laun seduai ila pan begulai pendiau jemah ila.

Pengawa seduai ke betunang malam nya, numbas ga pemanah iya di atur taja pan ba Kampung Selakau, menua Sematan. Kaban belayan mayuh ga datai ngulu. Tang enti di rumah panjai tentu pengawa nya mayuh agi ga pengerami.

Siti pekara ti di perati, pengawa malam nya di atur nadai alai mantah ba adat/chara Iban tauka adat/chara Selakau. Iban enggau Selakau, ngembuan adat/chara ti nadai jauh beda - ba adat sambut temuai, atur randau, pemakai, utai di irup sereta uti/tundi.

Manah meh nya Igat Hillary sereta Endun Melis, anang enda ingat ngangau baru datai ba maya/hari besai seduai jadi melaki bini ila. Kangau mayuh agi kaban belayan ari Kanowit seraya ke nemuai ke Sematan, Lundu, Sarikin enggau Kuching. Pia mega enti pengawa rami seduai di rumah panjai, tau tesau magang bala kaban belayan ari Sematan, kitai nguji menuh ka ruai ba rumah panjai seraya ke nemuai ke Kanowit, Sibu, Julau, Saratok enggau Sri Aman, lalu tau mega limpang ke hidro Dam di Lubok Antu.



Tichin dirasuk ba tunjuk ba mua padri lalu di kamata ka bala mayuh


Apai Indai Hillary sereta Apai Indai Melis


MC ke malam nya ngena jaku Iban sereta jaku Selakau kelimpah ari Bahasa Malaysia


Tuai Masyarakat sida Selakau mega di kangau sereta ngenatai ka jaku lalau malam nya


Sekeda bala terubah datai di Sematan maklumlah orang Sibu



Thursday, August 14, 2008

Pemujur ba Pelajar Sekula



Ngenatai ka pengaga ati ngagai nuan unggal Embam Ak Bundak, terubah laban nuan udah mujur meransang anak ba pelajar sekula datai ke Universiti sereta tulih ka Degree, kedua, pengaga ati aku betemu baru enggau nuan dalam kandang 30 taun ti udah lalu.

Ngagai anak nuan Endun Teresa, kami sebilik mega berasai gaga amat ati, lalu numpang pengaga ati apai seduai indai nuan, meda nuan udah mujur ba sekula, lalu udah "Graduate" ari UNIMAS tu tadi. Meri "tahniah" ngagai nuan Endun Teresa, sereta arap ka nuan mujur ngiga pengawa ti udah ba juluk ati nuan.

Nya meh gaya dunya baru diatu, ketegal ngiga pengidup, nyau jauh mega singkang pejalai kitai ngiga pemakai. Kelimpah ari nya, enti sema kitai udah ngepun ka pengidup baru di menua orang tau ka di nengeri, nyau suntuk jam ga kitai bebagi ka hari nemuai kin kia, tambah agi enti bala anak mekang besekula.

Maya permisi tentu bisi ga sida iya pengawa/aktiviti bukai baka tution tauka "scout/pertahanan Awam camping" lalu ngujung ka sekeda apai indai nadai peluang nyenguk rumah panjai pama enda maya Gawai.

Nyangka setegal pekara baka tu meh kebuah kami dua Unggal Embam tu enda kala serempak pulai ke rumah panjai, lalu ngujung ka kami dua tu kira bisi 30 taun nadai kala betemu, taja pan selalu ninga nyawa pangan diri ba tali alau.

Lebuh maya iya pulai ke menua nadai ga kala betemu pangan diri nyangka maya nya aku nyau ke bukai. Maya aku pulai, iya ga enda datai.

Suah ga rembus ke Miri maya bisi pengawa tusah sereta maya pengawa lantang, tau meh nadai ingat begiga ka pangan diri. Keno ko iya, iya mega suah rembus ke Kuching tang tau ga enda ingat begiga ka aku.

Nadai hal semua nya udah atur Petara, taja nadai betemu tang semampai betali paun enggau pangan diri.




Endun Teresa Ak Embam nerima Degree ari UNIMAS




Sekepin Ijazah ti di pelandik kena nyukat "kerjayaan hidup" maya diatu





Embam Ak Bundak seduai Anthony Banyan ti lama enda kala betemu taja pan diri semenua





Monday, August 4, 2008

Rami ka Endun Lia Beserara enggau WaiFM



Terima kasih ngagai Tuai Bagi Iban, RTM Kuching, Mr Laja Sanggin laban ti ngangau / mai ngulu makai berami ka Endun Lia berserara ari WaiFM kena lemai 29 Julai lalu ngagai dini hari 30 Jul 2008 tu tadi

Ngenatai ka pengaga ati ngagai nuan Endun Lia, taja pan nuan ngetu nyadi part timer ba WaiFM tang nuan udah mujur bulih pengawa ba siti Ministry di Kuala Lumpur, ti di anti nuan ngelama tu. Selamat mujur bejalai ka pengawa ti baru nya ngagai nuan Endun Lia.

Nuan beserara ari WaiFM ukai reti iya nuan deka ngelengka ka Radio Iban nyentuk ka ila. Lebuh nuan bisi peluang tau mega sekali dua nuan ngenatai ka berita ti manah di kunsi ngagai bala kitai di menua ditu ari alai nuan gawa di Kuala Lumpur din.

Aku arap ka Tuai bagi Radio Iban, Aya kita Laja Sanggin, semampai meri peluang ka kita ngena radio ngenatai ka berita ti manah awak ka bisi temu bala kitai di rumah panjai sereta bala nembiak rebak baru ti nadai kena ampit berita newspaper.


Mr. Raja Bustamam di apit Major Untai seduai Mr. Lankasty Narang



Bala DJ WaiFM



DJ Endun Lia di kelulung bala DJ sereta bala kaban bukai ti sama berami




Endun Lia sereta Ehm Ehm begulai enggau Mr. Rantai seduai Anthony Banyan



Mr. Jimbau, Anthony sereta Mr. Jack




Mr. Raja Bustamam ngepun ka Karaoke malam nya enggau lagu "Anang Ninga Lagu Aku"




Endun Lia sama singkang maya betanda




Mr. Akoi seduai DJ Insin sama nemu ngajat sama nemu betanda, nya iya bulih !!!




Pekit Poco-Poco betuai ka Raja Bustamam





Panggau Bujang Berani

Panggau Bujang Dara Endu Endun

Menua Apai Indai Aki Ini

Pupu Menua

Pupu Bansa