PPF 1584 Jembu Ak Awal

Akai dai, tembu bejegau nadai entap duduk, nya meh ngasuh nyau nadai peluang update berita ditu.

Minta ampun ngagai bala temuai, ukai sengaja ngelebu nadai mantai ka berita baru, tang laban pengawa bukai mayuh amat kin kia. Tu baru ngenduh ka diri amat. maya bejegau, muka laptop nyau ga lentuk-lentuk taja pan bisi servise broadband.

Berita sekali tu, agi nampung berita bala "Bekas Tentera", baka ke di ajih ga aku sempat betemu enggau Apai Terence (Jembu Ak Awul) pun bulan tu tadi. Iya datai ari Nanga Lingah Julau, nemuai ke Kuching, nasib manah lalu betemu enggau iya ba rumah menantu iya.

Taja udah tuai sereta lebih 40 tahun udah ngelengka ka senjata tang iya agi semampai ingat ka Nombor ti di lekat ba baju iya pengelama 6 taun kenyau ari 1957 ngagai maya iya ngetu kena 4.4.1962. Iya mega becherita madah ka mina siku dua aja sida ti nemu macha enggau nemu nulis.

Apai Terence mega becherita ka peluang iya niki pangkat sigi besai ari bala kaban iya ti bukai. Kebuah pia, nyangka tak semina iya aja bisi sekula datai ba Standard 3 ba St. Francis Xavier di Kanowit sebedau nyadi soldadu.

Jembu Ak Awul, No. Police Field Force 1584


cda

Sekeda Pengawa & Pekara kena Ngepun ka Taun 2010

Taun baru penemu baru runding pan patut baru ari nya pengerai kitai tau nambah manah. Pekara ti nombor satu di giga enggau di sampi kitai - pengerai, pengelantang, pengelikun sereta pemujur ba tubuh diri enggau tubuh bala anak.

Berita pemansang diri sebilik ti manah amat, kena mungkar taun 2010, terubah, pemutus peresa anak ba UPSR, kedua, pemutus "Along" (bank) meri pinjau meli "reban", ketiga, anak dipilih masuk Pom 1 ba Kolej Abdillah.

Berita bukai, endang baka selama, bisi manah bisi ga enda, tang sekeda nya mina tau nyadi ka lalau nyadi tenggau sepanjai taun tu ila.

Dalam kandang ke seminggu tu, sekeda ari pengawa ti nyadi kena ngepun ka taun 2010:-


1. Rejista Masuk Tahun 1 di SK Jalan Arang

Ayos udah graduate ari tadika Sunny Hill kena bulan Nov 2009 suba. Maya ti deka rejista ba SK Jln Arang tu tadi bendar amat iya madah ka diri enggai masuk tahun 1 tang agi deka ba sekula Tadika Sunny Hill ngulih ka mayuh kaban. Akai dai pedih amat pala mutar ka peminta nya.

Nama deh, nadai ulih begambar meh maya ti rejista ba kelas taun 1 SK Jln Arang. Mina gambar iya udah masuk ba hari ke dua baru ulih begambar.... tanda protest meh nya kini !!

Ayos dah pan masuk Tahun 1 taja ati agi berat deka ba tadika lama

2. Masuk Pom 1 ba Kolej Abdillah

Ujang siku ari 10 pelajar ba SK Jln Arang ti bulih pemutus ti manah ba UPSR 2009. Nasib iya sekali tu bisi manah minit laban ti kena pilih ngagai Pom 1 ba Kolej Abdillah tang enda mukai-mukai "tawaran pelajar harian"

Udah ti nerima surat tawaran ari Guru Besar pagi 2/1/2010, sereta udah ngerista Ayos ba taun 1, enda masau jam lalu terus ngelawa SMK Jln Arang, betemu enggau Pengetua. Berat mega asai ati tang agi begantung mega pemutus dini endor Ujang deka nampung masuk Pom 1.

Taja pan pemutus agi begantung sampai ka malam, tang ati Ujang agi bebelah bagi kebuah pia, laban iya sigi nadai kala nyepar ka diri ari apai indai enggau bala menyadi. Ari nya, selemai nya meri iya peluang nemuai sereta ninjau Kolej Abdillah.

Nama deh "sudah kenal, siapa kata tak cinta?" Ngujung ka Ujang mutus ka diri deka nerima tawaran Pom 1 ba Kolej Abdillah lalu ngapil ngagai Pengetua, Pn. Hajah Johara Zen, minta masuk Asrama. Nadai ga mayuh penanggul iga, Ujang di beri peluang masuk Asrama Putera Dr. Mahathir.

Ujang benung rejista Pom 1 Ruby



Ujang masuk Koperasi Kolej Abdillah



"Singkang Tangga" terubah masuk ke Asrama


Asrama Putera Dr Mahathir ba Kolej Abdillah



Ujang nerima Surat Tawaran ke Kolej Abdillah ari Guru Besar SK Jln Arang

2. Ngabas Kolej Abdillah

Kolej Datuk Patinggi Abang Haji Abdillah Petra Jaya Kuching

Asrama

List nembiak masuk ngagai Kolej Abdillah

Ujang ngabas Kolej Abdillah sebedau ngaga pemutus nerima tawaran

4. Serumpu diri Sebilik

Bala ipar ari Sibu permisi ujung taun mulai ka diri ba Kpg Bumbuk Kuching. Ari nya sida iya bisi nemuai ngabas pangan diri kala ka bisi rembus. Kena merindang bala anak, Apai Jean ngibun api betunu ka sayap enggau utai bukai ti bisi dia.

Ayos ngulu ka aya Apai Jean betunu

Ayos seduai Ujang begulai enggau bala petunggal datai ari Sibu

cda

Pengawa Ngapus ka Taun 2009

Selamat taun baru ngagai semua temuai, ngajih ka semua kitai bela lantang senang ba taun 2010 tu. Ba taun 2009 kemari tau ga kitai ninjau baru pemujur enggau pengelemi kitai, diri sebilik, diri empu sereta kaban belayan kitai.

"Ba taun ti baru, pemujur taun ti dulu tau di titih baru sereta ubah awak ka betambah manah, pengelemi kitai ba taun ti udah, sereta taun-taun ke dulu agi, naka ulih mega anang ngena, anang nujah kena nyeliah ka penanggul enggau nyeliah ka pemuntan ti kala nyadi"

Asai ba aku, genteran rambai jaku aku nya deka di kena aku ngepun ka taun 2010 tu, ngicha ka nambah ka pemanah ari pengidup ti udah. Selamat mujur dalam semua pengawa ba taun 2010 tu ngagai semua kitai.

1. Pengawa Diri Sebilik

Ayos di Waterfront Kuching

Bejalai di Waterfront Kuching taja pan lemai nya ujan

Serumpu diri sebilik

Pengawa cuti sereta ngapus ka hari

2. Serumpu Kaban Belayan

Serumpu enggau bala kaban

3, 2, 1, 0 jam 12.00 malam, taun 2009 mupuk, taun 2010 belabuh

Indai Jimbun berandau enggau Christina Umpi

Cr. Catherine Umping

aab