Selamat Gawai Dayak

Ngenatai ka pengaga ati laban ti sekali agi gerai nyamai lalu manggai ngagai taun ke entudi, sereta SELAMAT GAWAI DAYAK ngagai semua kaban belayan ti jauh enggau semak.

SELAMAT GAWAI DAYAK mega ngagai semua raban bloggers ti di kelala enggau enda, indu enggau lelaki, biak enggau tuai sereta jauh enggau semak.

Ngajih ka pengudah Gawai taun tu, kitai bela mansang, maju sereta gerai ari taun ke udah.

Peluang Betanam Vanilla

Berita sereta perkara pemansang betanam ti tau kena ngangkat ka ekonomi ti kena pansa lebuh ke bejegau enggau kaban.

Sempat ngena peluang nya nemuai ngagai nursery Vanilla ti baru lalu ti terubah di Kuching. Ukai sebarang ba nursery nya, paung vanilla quality manah di import ari India. Alai nerenak pan dalam kibung kena nan ka quality paung ti deka di jual baru.

Berita di temu ari Majalah Saji Januari 2009, madah ka rega buah Vanilla rangkai di Malaysia setiap kg dalam RM150 - RM300. Nitih ka berita nya mega, Vanilla tu mina tumbuh enggau manah ba alai ti lindung ari matapanas. Penumbuh iya enda berapa manah enti nadai utai ngelindung.

Pun enggau akar Vanilla tumbuh nitih ka tuat

Tangkai buah Vanilla nyau deka sebaka enggau petai

Atur nanam Vanilla dalam "kibung" nan ka quality paung enggau purih

Ha ha ha nanam baka ke nyamai, ujak aja baka changkuk manis enggau kangkung tang ngintu, gerenti pening pala

Apaienduq begambar enggau Project Manager Mr. Tanny

Serumpu ba Chung Nion Villa Jln Batu Kawa

Selamat ngepun ka pengidup baru ngagai nuan Igat Baha ti baru bulih pengawa ba MLNG di Miri. Ngagai Mummy seduai Daddy nuan, kami sebilik ngenatai ka pengaga ati, lalu ngarap ka nuan terus mujur dalam semua pengawa lebih agi ba kerja nuan nya ila.

Nadai berasai ga pengelama kira 14 taun ti udah lalu kami menyanak ninggal ka Chung Nion Villa lalu ninggal ka bala jiran tau kumbai NO. SATU. Diatu mina sekali dua nemuai ngabas sida. Enti enda salah ingat, tak asai ke tebal bala Dayak lebih agi bala Iban diau ba taman nya. Maya Gawai tau ka bisi pengerami munggang mit, bala Iban dia nadai kala betinggal ka pangan diri maya nya suba. Kala ga kami sebuat ngepun nyambut taun baru ba luar rumah, beanchau ka tikai bebai ka kerusi meja alai engkah pemakai. Nama agi deh, bala nembiak lebih agi peluang belanda kin kia.

Kena ke 30/4/2009 tu tadi, Apai seduai Indai Sirin bekangau ka bala kaban ti semak, makai serumpu lalu sembiang ka anak bujang seduai ti baru bulih pengawa ba MLNG. Lalu kami menyanak pan agi dalam list orang Chung Nion, terima kasih meh Apai Sirin & Indai Sirin. Tau ngangau baru maya nyambut menantu ila !!!!

Igat Reynason Dau Ak Jonathan Bangau (Baha) ti bisi nasib deka belabuh beredar gawa ba MLNG di Miri

Apai Sirin ngenatai ka jaku pengelalu ngagai bala temuai mayuh

Apai Sirin, Apai Jess, Apai Sanu & Apaienduq

Bala indai orang berandau nunga ading nunga piring enda kurang ga salai manuk enggau salai ngut rebak baru


Apai seduai Indai Sirin makai tang nyau pengujung bala laban kiruh ngetu bala bukai, anang malu makai wai wai !!!!!

Aki Sirin seduai Aki Kom ti lantang ati meda pemayuh bala uchu ti datai serumpu

Apai Janet duduk berimbai meja laban ti laun datai ari bala bukai

Apai Dyllan ngulu ka bala nyediaka "perau angat" .......................... (steam boat)

Persatuan Iban Remun Serian (SIRA)

Ngenatai ka pengaga ati ngagai bala kaban di Serian, lebih agi bala Unggal Eli Luntai laban udah mujur ngepun ka Persatuan Iban Remun Serian (SIRA). SIRA udah di regista ba ROS kena 5.12.2008 tang baru di pantar kena 25.4.2009 serambau enggau pengawa makai lemai ba Dewan Masyarakat Serian.

Yang Berhormat Dato Sri William Mawan, Menteri Pembangunan Sosial dan Urbanisasi Sarawak udah mujur mantar ka SIRA sebedau pengawa makai lemai. Bala ti bisi ngulu pengawa lemai nya enda kurang ari 700 bala temuai ti jauh enggau semak. Sokong ngagai SIRA mega datai ari SDGA sereta SDNU enggau DBNA. Di jangka ka SIRA tu meh NGO Dayak ti biak amat udah di tumbuh di menua Sarawak.

Nitih ka berita enda kurang ari 27 buah kampung alai bala Iban Remun di Serian taja asal sida iya datai ari Batang Kapuas Kalimantan Barat kenyau ari Abad ke 16 kelia berebak enggau Iban Balau sereta Iban Sebuyau.

Unggal Eli Luntai Pengerusi SIRA

Yang Berhormat Dato Sri William Mawan sereta Yang Berhormat Federick Manggie Bayoi

Tuai SIRA enggau semua Tuai Kampung sereta Penghulu Iban Remun

Raban ari SDGA meri sokong ngagai SIRA


Raban ari SDNU sereta kaban ti datai ari Limbang enggau Kampung Antayan


Sekeda bala temuai makai malam SIRA ba Dewan Masyarakat Serian


Elly Lawai pengari SDGA enggau lagu Bujang Lelayang terebai inggap di Serian

Kena pansa ke Serian, Lori Sampah labuh ke parit udah iya nguji ngaga U Turn ba Traffic light Kampung Seratau Siburan