3rd BDCHS Safari - Pontianak/Kuching (Part 5 - Pengujung)

Raban BDCHS pan udah berupai amat gaga gamal enggau penuh pengerindu sereta ngasaika peluang nemuai ke Kalimantan Barat nadai sekali penangi agi.

Selama tu numbas ga pengirau enggau penangi sida, pama disebut menua di Kalimantan. Udah tu diatu, udah meda ngena mata lalu berandau sereta bekelala enggau bala menyadi di Kalimantan din, jauh deka nangi tak nyangka mansang baru sekeda bebaika diri sebilik sebarang maya lepa taun tu ila. Pia jaku sekeda ti dinga ngerimbas pending.

Kena 1/12/2011 kami sebuat meleka ke Kpg Lingga kira jam 7.30 pagi. Betunda udi enggau raban Dewan Adat Dayak (DAD)sereta raban Persatuan Perempuan Dayak (P2D).

Malam penudi di Pontianak, raban BDCHS dijamu DAD enggau P2D Pontianak ba Istana Rakyat. Terima kasih ngagai Bapak Cornelis, Ketua Umum DAD Kalbar ti lalu nyadi Gubenur, ti enda sanggu ngelalu ka Safari SDNU, lalu sekali agi diberi peluang nemuai ke Istana.

Makai malam ba Istana lemai 1/12/2011 jam 7.00, numbas ga pengerami lalu mai peneleba baru ka sekeda kaban ti semina ninga aja ngelama tu. Udah tembu makai, bala pan lalu masuk ngagai Dewan Besai laban ngambi peluang begambar bebala mayuh ba pentas Istana.

Raban BDCHS mulaika diri 2/12/2011 ke Tebedu kira jam 10.00 pagi meleka ari Pontianak. Numbas ga maya nya, awakka enda beguai ngenatai ka diri ba Entikong enggau Tebedu.

Puji Tuhan, laban ti udah ngibun sereta ngiring pejalai kami sebuat ari mansang lalu mulaika diri enggau selamat tajapan ba menua Kembayan, kereta tak enda berasai "skidding", ngelebus jambatan mimit, dijangka laban jalai ba jambatan bisi betingkah, bengkuk sereta basah tegal bisi ujan mimit. Puji Tuhan kereta sereta kami sebuat nadai penusah nuntung laban ti enda laju tegal jalai mit. Lama agi ti bejaku, bandingka utai ti nyadi maya nya, sampaika kereta ngetu baka ti di "parking"

Pemulai kami sbuat, udah tembu semua pengawa ba Entikong enggau Tebedu, kami sebuat lalu beserara bela nuju alai diri empu, emua beirta ari pangan diri madah ka bela datai enggau selamat magang lebih agi sida ti mulai ka diri ke Sibu, Kanowit, Bintulu enggau Miri.

Ngari ka semua bala kaban ti enggau 3rd Borneo Dayak Cultural Heritage Safari ke Kalimantan ti diatur SDNU begulai enggau Dewan Adat Dayak Kalimantan Barat (DAD) lalu disukung penuh penuh Kementerian Pembangunan Sosial Sarawak lebih agi YB Tan Sri William Mawan Ikom.

SDNU meri besai terima kasih ngagai YB Tan Sri William Mawan Ikom sereta Polsec En. Paul Igai seduai En. Hollis Howel. Terima kasih mega ngagai Pn. Nancy seduai Pn Alice ba Opis Menteri Pembangunan Sosial Sarawak. Arapka SDNU diberi pengarap baru ngatur pengawa nya ti ke empat kali taun dudi nyin ila. Terima Kasih sereta Selamat Taun Baru !!!!

1. Makai Malam ba Istana Rakyat

Tanda pengingat ari SDNU ngagai DAD Pontianak diterima Bapak Henry ari En. Isaka Kana


Tanda pengingat ari DAD ngagai SDNU ti disua Bapak Henry ngagai En. Anthony Banyan


Bapak Tarsasius begulai enggau sekeda raban Safari


Bapak Deddy seduai Ibu Maria begulai enggau sekeda raban Safari


Bapak Sahala Sentri begulai enggau sekeda Komiti Pengatur Pengawa BDCHS

2. Nemuai ke Kpg Lingga, Embawang

Bapak Tarsasius madahka pala ngut nya steady amat !!!

OKKKKK, nguji pala ngut, steady tu........peluang nengali waiiiiiiiii !!!!!

Bapak Yakubus enggau Tuai Temuai di beri penerang pasal program ti udah diatur ka pagi nya

Bala temuai sereta bala mayuh ti sama ngulu pengerami pagi nya

Panglima Edi Barau enggau bala Polisi benung merindang diri di belakang

Piring ading ka pengelalu temuai duduk

Penatai bala temuai ngagai rumah Adat disambut ngena "tetak tebu ba kaki tangga"


Raban BDCHS begulai enggau DAD sereta P2D Pontianak baru datai ba Kpg Lingga, Embawang


Sekali dua betudung baka tu, rindu ga kena mulai ka pengingat agi mit kelia !!!

Ujan oh ujan !!!

Mulaika diri ari Kpg Lingga dalam ujan lebat


Berita Safari ti ayan dalam surat berita di Kalimantan Barat, terima kasih ngagai nuan Kris Lucas ti ngirum ka berita tu

cda

Selamat Hari Krismas & Taun Baru

Kami sebilik ngenataika pengaga ati, meri Selamat Hari Krismas sereta taun baru 2012.

Taja pan udah laun, tang laban pengiruh sereta peluang jarang amat ga ulih nyenguk Penjurai. Kengka peluang ke bisi, ngabas enda lama ga sekali dua kandang ke seminggu tu. Peluang ga enda mayuh, tak enda selin-lin ga selalu seminggu tu, bisi penanggul ga moderm, nya ngejungka Penjurai enda ulih "nitihhari" (update).

Ujung taun sekali tu, nadai mindah kini-kini kami sebilik laban bala nembiak cuti pan enda serentak tambah agi, angsa agi ngenduh ba workshop masuk ba bulan ke empat kenyau ari 30/8/2011 suba. Arapka ia ulih engkebap minggu dudi ila, sebedau sekula dibuka baru. Balat ga workshop beduan, nadai sekali-kali berumban ka kitai, ukai nama, laban duit insuran udah 100% gerenti masuk, taja tumu tauka laun.

Nya meh sekeda penusah ti nuntung ba taun 2011 tu. Arapka ba taun 2012 tu ila, ngetu dulu penusah sangkai ba kami sebilik, ngicha ka lantang enseput nitihka singkang pemansang bala bukai. Taja pia, puji sereta terima kasih mega ngagai Ia ti udah meri penguji !!!!

Selamat Hari Krismas sereta Puji Tuhan !!!


aab

3rd BDCHS Safari - Singkawang/Pontianak (Part 4)

Nyau enda berasai, buka mata nyau masuk ga hari keempat. Raban BDCHS bejegau enda lama di Singkawang kena pagi 30/11/2011, udahnya mupuk baru nuju Pontianak. Paginya mega kira jam 7.30 kami sebuat di bai Bapak Aberson nguji ka bubur ti pemadu special di Singkawang. Amat special bubur nya kaban, ila tau tapat baru pama agi bisi rembus ke Singkawang.

Ari Singkawang, kami sebuat mayuh alai ngetu, seraya ke beranti-anti enggau sereta meda menua alai ti dipansa.

Seiti pekara ke jenaka amat nyadi, seiku kaban kami udah lebih 3 bulan expired driving license tang nadai sedar taja pan nyau udah kelang-kelut lebih 6 kali mansa Tebedu enggau Entikong. Enda jauh ari Sungai Pinyuh, nadai ulih seliah ari di peresa polis maya Road Block. Terima kasih ngagai Bapak Polisi laban ti enda tentu balat ngiruh ka raban safari. Kaban kami nya semina enda diasuh megai steering agi. Beganti meh Pak Supir belabuh ari nya ngagai hari penudi samapi ka di Kuching baru.

Tugu Khatulistiwa, alai penudi endur ngetu sebedau datai Pontianak. Bala begambar sereta bebeli ka sekeda pengingat diri udah datai ba tugu tu. Sekali tu, bala nadai bebelika sijil, laban stock sijil udah ambis. Semina gambar aja meh nyadi ka pengingat diri empu udah ngetu ba tugu ti semina seiti tu aja ti bisi ba dunya tu, ti kena ka nandaka garis antara Utara enggau Selatan dunya.

En. Isaka Kana nerima patung kayu ari seiku artis ti ngukir Rumah Betang Pontianak


Bapak Yakubos ngelalu ka penatai raban BDCHS


Sekeda bala BDCHS

Ngelalu penatai raban BDCHS, gambar ari Lantap Freddy

Panglima Udin, Panglima Dedy enggau Panglima Ribut @ Sawing ngayan ka main asal Dayak, gambar ari Lantap Freddy

Poco-poco kena mansutka peluh, gambar ari Collin Isaka


BDCHS eenggau bala DAD, gambar ari Lantap Freddy

Raban BDCHS ditiki enggau adat basa ba Rumah Betang Pontianak

Bala veteran ba Kapuas Palace Hotel sebedau mupuk ngagai Rumah Betang Pontianak

Makai tengahari ba Pontianak


Tugu Khatulistiwa, gambar ari Lantap Freddy

Betabi ari Utara enggau Selatan ba garis Khatulistiwa


Mupuk baru nuju ke Pontianak

Ngetu ngirup tisi jalai nebing Tasik enda jauh ari Sungai Pinyuh


Nganti bubur special di Singkawang, begulai enggau Bapak Aberson sebedau mupuk ke Pontianak

Raban BDCS Safari baru deka mupuk ari Hotel Sentosa Singkawang pagi 30/11/2011

Note: Tampung berita sereta sekeda gambar Safari deka diayan ba posting baru ba sebarang maya ti lantang

cda

3rd BDCHS Safari - Ngabang/Singkawang (Part 3)

Ba hari ketiga 29/11/2011, raban BDCH Safari mupuk baru ngejangka rumah panjai Kampung Sahapm nuju ke Singkawang. Konvoi BDCHS mansa Pasar Sidas enggau Pasar Bengkayang.

Terima kasih ngagai raban Polantas (Polis Lalulintas) laban ti enda sanggu nganjung konvoi Safari ngagai sempadan Landak/Bengkayang. Jalai raya ti ditengah nya numbas ga pengemit sereta bingkuk liuk, nya kebuah Bapak Bupati minta Polantas nganjung konvoi naka menua alai jalai ti manah.

Di Bengkayang, raban Safari ngetu belelak enda lama tisi jalai ti enda jauh ari Kantor Bupati Bengkayang, serayaka berantika sekeda berisi ka minyak, kemi, lalu bebelika reload enggau bateri kamera. kelimpah ari beranti ka pangan diri, bisi ga sida iya berulamka "sadin beruang" tiisi jalai kena muai pengelelak. Nadai salah ga nya kena merindang diri tambah mega nadai tulang.

Mupuk ari Bengkayang, lalu nuju ke Singkawang. Raban BDCHS, ngetu tengahari ba seiti kedai tisi jalai atas bukit. Endor nya, endang alai pengkalan ngetu, kedai ti numbas ga peninggi, rawan amat nilik ke belakang, apuuuu neh nyau bela enggau puchuk kayu mesai GUSAR.

Nyau berumban-rumban makai, manuk sereta pemakai bukai endang udah chukup, dibekalkan bala dirumah panjai Sahapm.

Ribuan terima kasih kepada Bapak Bupati dan isteri, semua warga rumah panjang Sahapm dan semua Pengurus DAD Landak kerana sudi menerima persinggahan BDCHS. Salam persaudaraan juga kepada semua yang terlibat dari Kantor Bupati Ngabang. Terima kasih kepada semua penduduk Kampung Sahapm yang begitu setia denagan aturcara yang telah dirancangkan oleh Pengurus DAD Landak yang diketuai oleh Pak Abi.

Bala raban Safari disambut Dewan Adat Dayak (DAD) ba Rumah Adat Singkawang

Ketua DAD Singkawang, Bapak Aloysius Kilim ti nyambut penatai raban BDCHS

Sekeda ari bala indu


Bala temuai bukai ti sama ngulu pengerami lemai nya


Bala indu nyambut penatai bala mayuh ngena tanda asal Dayak Singkawang

Bala BDCHS diambat lalu ditiki ngena adat basa

Bala Kumang enggau Keling Dayak nyambut penatai raban BDCHS


Rumah Adat Kota Singkawang

Sida tu, nyau telungga-lunga meda gaya sambut

Kedai tisi jalai ba atas bukit, belakang rumah sebaka tinggi enggau puchuk kayu

y

Ngetu ba Pasar Bengkayang

Sekeda pasar baru ba Bengkayang

Pemakai pagi nya udah sedia nganti penatai bala ti mandi

Jaku penudi ari Kades (Kepala Desa) sereta Pak Sufendy (Sekjen DAD Ngabang)


Makai pagi di ruai

Pak Abi sereta Pak Sufendy

Begambar enggau Kades sereta Pak Abi, Wakil Ketua Umum DAD Ngabang ba tanju

Nurun ninggalka rumah panjai


Konvoi BDCHS diuluka Polantas


Tumu pagi dani, minyak diisi dulu sebedau mandi, makai sereta mupuk ninggalka rumah panjai Sahapm

Note: Tampung berita sereta sekeda gambar Safari deka diayan ba posting baru ba sebarang maya ti lantang

cda