Projek Pemansang ba Pasar Mit di Pesisir

PASAR PAKAN

1. Stadium Sukan

Pelilih menua Pakan ngasai ka penguntung ti besai, setegal perintah udah ngaga Stadium Sukan ti baru di penyadi Menteri Pembangunan Sosial dan Urbanisasi Sarawak, YB Dato Seri William Mawan kena pagi 28 Sept.2007. Mayuh mensia datai ngulu pengerami pagi nya kelimpah ari bala Tuai-Tuai Masyarakat, bala Pemesai ari opis-opis perintah ari Pakan, Julau, Bintangor, Sarikei serta mega ari Kuching.

Mensia mayuh di Pakan di pinta besaup enggau perintah
ngangkat ka pendiau pengidup serta nyaga ngibun semua pemansang ti di tumbuh ka perintah ka semua raban bansa awak meri penguntung ka semua rakyat.








Menteri serta wakil-wakil opis perintah ngemata ka tandatangan nyerah ka Stadium ari Kontraktor En Musa Giri ngagai En. Adrian Luang wakil Majlis Daerah Meradong

Bala Pemesai opis perintah enggau Menteri begambar ba mua Grandstand

2. Jalanraya

Lama udah enda nemuai ke Pakan kandang 4 taun tu kenyau ari pasar tu di angkat nyadi siti district. Mayuh pemansang udah nyadi ba pelilih Pakan , jalairaya udah ga di tar ari Simpang Jalai Bintangor-Sarikei. Enti suba pejalai 2 jam tang diatu mina kira 30-45 minit aja ari simpang.

Jalan simpang Pakan baru di tar, logging truck patut sama nyaga jalai ari rosak, nagang mai over load

Jalan KJD (Kanowit-Julau-Durin), benung di upgrade ngagai Trans-Borneo highway standard

3. Market/Tamu

Sebedau mansang ngagai Stadium, sempat ngirup kopi ba kedai, lalu ngambi peluang mega ngabas Market/Tamu ba ujung pasar. Mayuh bengkah utai ari babas di jual ba Tamu dia. Berasai megah amat ati meda bala ti bejual dia tebal agi bansa kitai. Arap ka semengat bejual utai ke mit tau nyadi pemun nyadi orang dagang mega.




4. Dewan Masyarakat

Dewan tu di jangka ka agi baru amat, di peda ari design enggau pemersi dalam enggau luar. Iya mega beseberai enggau pasar.

Udah pengawa bejadi Stadium, tengahari nya semua bala ti datai lalu bisi di sedia ka utai di kena merarau. Nyadi kami sempat di bai merarau ba Dewan Masyarakat Pakan. Pemakai pansuh manuk, pansuh ikan enggau bulu babas bisi kena ngemantup ka tetenguk bala kami sebuat.






5. Opis - Opis Perintah Pakan

Bala kami sebuat, sama nadai sempat nemuai ngagai opis perintah, taja pan orang ti udah lama di kelala, Mr. Inting Nyami ti nyadi Tuan DO Pakan. Taja pia, ngenatai ka pengaga ati ngagai nuan Mr. Inting Nyami, ti mangku pengawa nyadi Do. Maya bukai ga bala kami mansa nuan dia, arap ka ulih nyedia ka tekuyung minyak sungai munyi ko cherita nuan maya nya kemari.









PASAR JULAU

Pemulai ari Pakan, raban kami lalu di bai ke Kanowit. Tang sebedau datai di Kanowit sekeda bala kami limpang ngetu ke Pasar Julau. Sempat ga ngiga alai "Posing".

Ngingat diri maya agi ngena perau kelia, Jelatung meh alai sekeda kitai ngemas ka diri sebedau niki ke pasar. Diatu, pekara nya nyadi ka cherita aja.

Penyangkai/Jelatung, taja pan Pasar Julau udah lama datai jalairaya, tang perau agi nyadi ka perengka pemindah kin kia lebih agi bala ti datai ari ulu Kanowit serta semua pampang sungai Kanowit ari kiba mudik.

Kedai terubah ba Pasar Julau

Amat lelengau, dini Jelatung alai mandi serta perau sangkai?

PASAR MACHAN

Emmmm, pemulai ari Kanowit, peluang amat ngabas Pasar Machan. Nganti ke pagi siti deka makai mee kampua. Pasar Machan tu, di pansa ke ulu ke ili ke Julau enggau ke Pakan sebedau taun 1975 kelia, tang di jangka ka diatu, 99% orang Pakan enggau 60% orang Julau nadai kala
nemuai ke Machan kenyau ari 1975. Ukai nama, Pakan enggau Julau udah datai Jalairaya, sida muntang amat diatu ulih terus ke Sibu, Bintangor tauka Sarikai, nadai agi ngili tauka ngulu ai mansa Machan tauka Kanowit.

Projek Waterfront ari KDC
ba mua kedai lama, projek pemansang ba 9th Malaysia Plan

BETONG

Pusat Internet Desa Betong

Lebuh ke mansang nemuai ke Pakan, nasib bisi peluang ngetu ba Pusat InternetDesa di Betong. Pusat tu di atur Kementerian Tenaga, Air dan Komunikasi Malaysia(KTAK), lalu bisi 3 pegawai ke nyaga, ngemata serta ngelatih bala ti nguji, belajar serta deka nemu pasal internet enggau komputer. Dua iko pegawai dia Iban, lalu siko da pegawai Volunteer ari Jipun. Nitih ka berita ari tiga pegawai nya, pusat lalu endor tu ka kelalu mit, computer mina 5 iti aja, nya alai selalu penuh di tapat ka bala nembiak sekula ke begiga ka references ari internet.

Berandau enggau tiga Pegawai ba Pusat Internet Desa Betong (En. Unong Jubin, En. Daichi Hirano & Francis Benet)

Dua nembiak sekula secondary benung ngiga refences ari internet

Bala nembiak sekula primary benung ngena internet