"DATAI SELALU"

Nama runding enggau sagam ati kita enggau leka jaku "Datai Selalu"? Kala meda dini "Datai Selalu" di tulis?

Emmmm, nya meh aku pan amat tetenguk deka nanya lebih silik pasal "Datai Selalu". Udah puas ti bebitau ba Market Besai Sibu meda buah dabai, daun mendai, daun sabung enggau tekuyung sungai, kami dua kaban aku pan lalu nuduk ka diri ba mua "Datai Selalu". Nama deh baka selama, kitai duduk datai mega orang betanya ka utai pakai enggau ai irup kitai.

Enda chamang-chamang terus nanya, ni Tukay kita? Saut tudah, "nyin Tukay Neo, ibu aku". Manah meh nya, kangau kitu, kami duai tu deka "bekelala" enggau Tukay Neo!!!

Pandak ka cherita, "Datai Selalu" tu siti ari kedai makai/kopi ti bisi ba Market Besai Sibu, ti empu siko indu Iban ti datai ari Singat, Batang Lassa Sibu.

Terima kasih ngagai nuan Pn. Elen Ak Maragat laban ti "mesra" amat, taja pan kami duai tu ti baka ke nundi nuan enggau mayuh amat utai tanya pagi nya. Minta ampun mega enti chara kami duai maya nya enda ngelantang ka nuan.

Bala mayuh, aku mai bala kita ngetu ba "DATAI SELALU" lebuh ti bisi rembus ke Sibu, lebih agi udah kita begiga ka sayur "bulu babas". Siti ari chara kitai nyukung bala tudah ke bedagang meh nya!

Nitih ka cherita Pn. Elen, iya udah ngepun ka pengawa Kedai Kopi kenyau ari maya agi di rumah panjai bekedai runchit, udah nya nguji bekedai kopi bejual ka panggang sayap enggau dagin babi ba "Pulau Babi". Iya mindah ngagai atas Market Besai kenyau ari 15.2.1997. Iya mega madah ka diri enggau liat ati ngereja pengawa dagang, ngiga belanja kena ngemesai ka dua anak, ti biak lelaki, agi ba pom 6, SMK Sacred Heart Sibu. Anak tuai indu, mega datai ngagai pom 6 tang diatu mantu iya ba "Datai Selalu"

Pn. Elen mesan bala kitai bukai lebih agi sida ke indu, tau ngepun ka pengawa bekedai kopi ngena chara ti mit, laban keno ko iya, tu meh "kemampuan" kitai ngiga pokok dulu. Iya mega bisi nyebut, nadai sekali-kali nesal ninggal ka rumah panjai ngepun ka kedai kopi maya nya suba. Ari ti bekedai mit nya, iya mega nguji nyua/nyewa rumah atas lot kedai, lalu di gaga bilik. Nyedia ka bilik Sewa. Ba penemu aku, kira udah mujur meh Pn. Elen Ak Maragat ngidup ka diri ngena chara dagang mit.

Bala mayuh, taja pan di peda udah mujur, bala tudah ti bisi dagang mit tu, endang iya bepanggai ba sukung kitai mayuh. Enti bala kitai enda nyukung sida, sapa agi?

Ngagai Pn. Elen sereta sida menyanak, aku ngenatai ka pengaga ati (Tahniah) sereta puji, arap ka nuan betambah mujur ari sukung atas "kesedaran" bansa kitai empu ngetu ba "DATAI SELALU" pagila lusa.

Pn. Elen Ak Maragat, ti bisi pengeliat ba pengawa dagang, semampai minta sukung minta tulung kitai mayuh nemuai ngagai kedai kopi bala kitai

Apaienduq ngambi peluang begambar enggau Pn. Elen seduai anak bujang iya ba mua "DATAI SELALU"

"DATAI SELALU" chukup strategik, ba Market Besai sereta Multi-Stories Car Park Sibu, bala kitai ngetu meh ba DATAI SELALU udah kitai bitau-bitau ba market tauka sambil kitai beranti ka pangan diri