Hari Ti di Ingat Belama - 28/2 & 1/3 ninting taun

Mulai ka pengingat diri sebilik. Sehari tu genap 6 taun orang ti pemadu di sayau ti di kangau aku apai, tama tanah. Iya madam ka seput kena tengahari 28.2.2004 lalu di intu lemai 28 enggau 29.2.2004. Kami menyadi sereta bala uchu iya enda sampal sempat meda iya madam ka seput ba mua bini iya ti kangau kami Indai/Ini, laban sekeda ti diau jauh mempar ari menua.

Kami menyanak di Kuching, ngatur diri mansang ke Sibu pan udah pandak runding, enti semina batang tubuh, nyangka nyamai ga berunding. Bala anak agi di sekula, pemulai ke Sibu ukai di sadang nya ngasuh semua pengawa kelam kabut. Nasib meh bisi seat/penduduk ungkup kami menyanak ngerumban ngena flight pukul 4.00 lemai. Sempat ngatur semua pengawa sebedau ninggal ka rumah, laban bisi bantu bala pangan seopis ngadu ka utai ke tinggal, sereta nganjung ke Airport.

Gaya hari lemai nya amat manah, nama deh terebai meh bilun Boeing nitih ka jam baka selama. Pejalai Boeing ari Kuching ke Sibu enda sampai 30 minit, tang enda mukai-mukai lemai nya Boeing bejalai enda kurang ari 50 minit, enda ulih sangkai di Airport Sibu ketegal ribut enggau ujan lebat.

Nama deh ngujung ka bilun kami nikal baru ke Kuching, lalu nganti dalam bilun pan enda kurang 45 minit. Bilun berangkat baru kali kedua sebedau pukul 6 lemai, mujur mega pejalai kami ngenatai ka diri di Sibu. Pekara ke nyelai nyadi, makin kami berumban bilun ga nyau kelang kelut nikal - "nemu amat meh aki kita tu beduan kitai, awak ka lama agi nepan bilun" pia ko anak mulut kena ngenyamai ka diri. Ayos maya nya dini nya nemu utai, agi chechinang baru masuk 3 bulan. Menyadi ke bukai kira OK, sigi udah nemu nama utai ke nyadi, udah nemu nyebut "kasih aki kitai parai, anang manchal kitai lagi"

Taja pan ukai di senggai di rumah panjai tang mayuh mega kaban belayan ti jauh enggau semak datai rabat ba lemai penudi 29.2.2004. Bala ari rumah panjai pelilih Machan, Kanowit enggau Julau mega mayuh datai.

Terima kasih ka penatai sereta tulung bala kaban belayan ari Kuching, Sri Aman, Saratok, Sarikei, Pakan, Julau, Kanowit, Song, Kapit, Bintulu, Miri, Kuala Lumpur, Johor Baharu, Port Dickson lebih agi ti ari Sibu.

Penudi ari kami menyanak, "aram kitai sama besampi ngagai Allah Taala, minta semengat niang ExTR Banyan (Apai/Aki) ti udah tama tanah sehari tu genap 6 taun, arap Allah Taala mai semengat iya begulai enggau orang Sante di menua Serega, Amen"

ExTR Banyan mina sempat begulai sereta meda bala uchu tang enda sempat meda bala ichit

ExTR Banyan sempat nemuai ke Singapore dalam bulan 8 taun 1989

cda