Mulai ka pengingat ka Niang Apai, Ex-TR Banyan
awak ka bisi di peda bala uchu & anak iya ti diau ngachir kin kia.
Iya madamka seput kena 28/2/2004 lalu di senggai
2 malam, malam 28/2/2004 enggau malam 1/3//2004, iya ditumbak ba pendam Gereja
Sacred Heart ngerimbai Jalai Salim Sibu kena 2/3/2004. Sehari tu 1/3/2012 udah
manggai 8 taun meh niang tu udah ninggal ka bini, bala anak enggau bala uchu.
Mayuh pengawa iya ti agi nyadi ka pengingat bala
anak iya. Taja iya anak tuai, tang iya meh ari sida menyadi ti nyau deka penudi
niri ka ruang bilik. Nyangka setegal maya iya ti agi biak kelia, iya ngejangka
menua, laban ti enggau orang "bejalai" ka menua Sandakan. Maya iya ba
Sandakan, iya kena pejal nyadi soldadu Jipun dalam taun 1941 kira maya Jipun datai
di menua SABA.
Pengudah Jipun alah perang 1945, sida sebuat ti
datai ari Sarawak lalu bekuli ke Jeselton kira taun 1946, udah nya ngelansat
dalam taun 1947-1948 ke Brunai, Seria enggau Kuala Belait ngujungka sida mulai
ka diri ke Sarawak nepan kapal kayu ari Brunai ke Sibu kira taun 1950.
Seiti utai ti besai amat ulih iya maya ti
"bejalai" nya, iya di ansak "macha" maya malam hari lalu
ngujung ka iya nemu nulis, nemu macha enggau nemu ngira. Lebuh iya udah
datai di menua, iya lalu ngajar seiku ari menyadi iya Jantan (Ex-Pemancha
Jantan), "macha" lalu ngujung ka menyadi iya nya pan nemu nulis, nemu
macha enggau ngira sampai ka diatu.
Maya ti ngenang iya, genap taun, bini, bala anak,
bala uchu sereta bala kaban belayan, agi ngasai ka penyiru enggau pengerindu
iya, nya alai, kitai patut mega semampai besampika semengat iya diau nyamai
sereta likun begulai enggau orang Sante di surga, laban pengerindu, penyayau
kitai ba iya meruan belama.
Berita ti ayan ba Borneo Post kena
2/3/2006
AAB
.jpg)
No comments:
Post a Comment