Selamat Betemu Baru

Selamat  Gawai Dayak taja pan udah ngelebus maya, ngagai semua temuai ti bisi mansa Penjurai Apaienduq tu !!!

Sebedau mantai ka berita ti nyadi 2 bulai ti udah, aku ngenatai ka jaku sori ngagai semua kaban belayan ti nyenguk Penjurai Apaienduq tu. Jangka aku mayuh kita tekenyit tepansa ka Penjurai tu nyau mayuh amat uras sereta balat amat pukat empelawa. 

Kebuah pekara nya nyadi, (i) teknikal problem maya upload gambar nasib ga tudah Apai Serani ulih mantu, terima kasih ngagai Apai Serani ti kiruh amat maya Gawai tu kemari, ulih mega mantu mutar ka penanggul nya, (ii) aku empu selalu nadai jenuh laban ti selalu amat ngabas palan alai bumai taun dudi tu ila, selalu mega di bai sida bebiau ke ulu ke ili belabuh ari 5/5/2012 - 18/6/2012 tu tadi, lalu ngujung ka Penjurai enda di intu.

Endang baka selama, bulan 5 enggau bulan 6, nya meh maya sekeda bala kitai kiruh ngatur pengawa ti serambau enggau Gawai Dayak. Bisi ga sekeda bala kitai nadai pengibuh sekali ga ka nama-nama utai ti nyadi kiba kanan. Orang Gawai, sekeda bala kitai enda berat ka pengawa nya, kenu ko, Gawai sebaka enggau enda Gawai meh, nama penguntung kitai deh ! 

Bisi ga sekeda, dengan bangga sekali iya becherita "kami menyanak 16 taun nadai kala pulai ke rumah panjai, Gawai pan kami menyanak sigi enda kiruh" Akai dai nama runding kita, enti ninga utai munyi nya .......ba aku, kaban nya, sigi mantai ka pemeli diri. Mayuh kebuah iya chukup beli.....(i) ngajar bala anak nadai nemu penatai diri, (ii) iya mega nunjuk ka diri, bini nyadi "boss", (iii) mantai ka pemeli iya empu, mutuska kaul bala anak enggau bala diri sebilik sereta diri serumah. Ba kitai tu tusah amat ka berundingka mensia ti ngembuan penemu baka nya.

Berita ti nyadi kandang dua bulan ti udah, deka ditampung/diayan ba Post ti nangkan ka tu. Terima kasih

AAB