Pengawa Rama

1. Tuntung 3 Penusah Betampung

Lama bendar ga enda bejalai ke Bintulu, penudi endar ke Bintulu maya Perintah bejadi ka SCORE dalam January 2008 kemari. Pulai ari Bintulu lalu bejalai ke Serau Julau laban ngulu pengawa ngetas ulit ka siku ari ibu (Indai Jantom), ti udah nadai kena 28/6/2008.

Indai Jantom nadai serebak enggau bala uchu iya ngerijister diri masuk universiti. Nama deh ukai semina bala uchu enda ulih ngenatai ka diri lebuh ke nyenggai, sekeda bala menantu sereta bala anak pan sama enda ulih datai setegal jauh ari menua, bisi di KL, bisi di Trengganu, bisi mega di Saudi Arabia.

Lalu pia mega, nadai di sadang, kena 5/7/2008 siko ari ipar (Apai Senah) nadai maya pagi hari, di Machan Kanowit. Maya tu, kaban siku benung di Sanggau Kalimantan begulai enggau raban SDNU nemuai di kangau ka Bupati ngulu Gawai. Nama deh nadai meh kaban siku tu ulih mulai ka diri. Enti pulai pan nadai mega sempat meda mua niang ke nadai. Taja pan baka nya kaban semina ngenatai ka diri hari niang nya tama tanah, semadi empa penenggai diri di kumbai enda nyengguk ka mua ngagai bala ti tinggal.

Bala Uchu, Anak sereta Anak Menyadi Pemancha Jantan gempuru pengudah ngetas ulit ka niang Indai Jantom


Pemancha Jantan begambar enggau bala Anak Menyadi

Apai Chemit, kami besampi ka roh nuan begulai enggau semua orang sante di menua Surga

2. Ngetas Ulit


Endang baka selama, dua tauka tiga minggu udah nya bala dikangau datai baru, ngetas ulit. Semua kaban belayan mega ngasai ka nya meh peluang ti penudi datai meri basa ngagai iya ti udah lesi, sereta meri bantu nanggung penusah ka sida ti tinggal.

Kaban tu pan sempat ngenatai ka diri enggau ngetas ulit. Sampal mega ngenatai ka diri mai bala budak, laban ngasai ka diri agi diri sebilik enggau sida Indai Chemit, ti kena tuntung penusah Apai Chemit ninggal benung kami sebuat mulai ka diri ari Serau Julai.

Berita Apai Chemit nadai pan benung kaban tu baru niki ngagai Airasia mulai ka diri ke Kuching.

Apu nadai utai asai tu deh, pulai Kuching udah nya mansang baru ke Sibu. Ba belanja, anang nyebut agi, tang ka pan enda, pengawa tu nya pengawa tusah. Ngesah mega kaban tu tang nyau berasai amat ngenyadi, ngena bas express mega pengujung ari Kuching ke Sibu udah nya ari Sibu ke Kuching.

Phillip seduai Chemit muai ulit lalu di kemata ka Ini ti ngada ka indai seduai

Kennedy seduai apai iya sereta Dom Renang mega betunda udi muai ulit

Pengawa ngupas sereta muai tebalu ba tudah Indai Chemit

Nembiak pom 3, Government Secondary School Kanowit 1970

3. Limpang ke SK Entabai

Sebedau mulai ke diri ke Kuching, kaban sebilik ngena peluang neresa menua ke Julau lalu terus ke SK Ng Entabai setegal deka betemu enggau Cikgu Jeffrey Jugah.

Sebedau ngelayang ngagai sekula, tekenyit amat kaban, nadai di sadang, siko ari orang ke duduk ba penyangkai lalu ngelawa sereta numbal ka nama kaban!!!! Apuuuu deh, nadai utai asai nya, tekepang ati enda tepansut ka jaku seleka mukut.

Kelia diri serumah sereta bekas Classmate ba sekula ulu sungai, tang iya udah ngepun ka ruang bilik di Ulu Mujuk. Iya udah ngejang ka menua lama kira bisi 20 taun, nya meh ngasuh kami duai lama amat enda betemu enggau pangan diri.

Nama deh, laban sekula ke seberai penyangkai kereta, kaban aku tu tadi pan lalu "offered" nyangkai ka seberai. Enda mukai-mukai, bala budak bisi ninga, chukup pengaga lebih agi kaban ti umur 4 taun. Keno ko iya "Tau kitai nepan parau Dad?". Enda ngelebu kaban lama, lalu pia mega enda ngelebu kaban umur 4 taun, kami sebuat lalu nurun ke pengkalan, enda ngena jambatan gantung ke sekula.

Terima kasih ka nuan Akih Nuing Ak Maling, aku besampi ka nuan sereta kita sebilik gerai belama taja pan diau jauh ari menua diri empu.

Aduh, enda mukai-mukai, ppejalai kami tu lalu enda betemu enggau Cikgu Jeffrey setegal salah info lalu salah Quarters di tuju. Meda baka nya kami sebuat lalu mupuk mulai ka diri.

Sebedau mulai ka diri, sempat ga ngulu ka bala budak, meda pendiau pengidup ba Asrama di sekula pesisir. Sempat mega meda sekeda nembiak taun 1 taun 2 ngidup ka diri jauh ari apai indai. Siko ari sida iya sikuk-sikuk nyabak kena keduan pangan. Enda tepansut ka leka jaku sekeda budak kaban, laban nadai pechaya ka pengidup merinsa diau ba asrama maya umur nya.

Mupuk ari nya, bala budak numbas mega pengaga, bejalai niti jambatan gantung, kala sida iya niti jambatan gantung tang nadai kala ngemanjai sereta ninggi nya.

Pulai ari Entabai semaya ka ngetu ba Kubu Brooke, Ng Meluan, tang enda nyadi laban ujan kelalu lebat. Taja pia kami sebuat ngetu ba Rh. Sujang, Kerangan Buluh, rumah panjai sida Cikgu Jeffrey. Tekenyit amat ga bala petunggal Cikgu Jeffrey meda penatai kami sebuat, taja pia kami di sambut di tungga sida baka temuai bukai, laban sida iya semampai ingat ka diri bisi kaban belayan ti datai ari jauh.

Nuing Ak Maling nyaga bala nembiak nepan "paro" di kena ngelayang ngagai SK Ng Entabai


Nuing Ak Maling begulai enggau bakih lama iya Anthony Banyan


Ba peniki SK Ng Entabai Julau


Carlos seduai Carlson tekepang ati meda sekeda nembiak mit asrama nyabak enda betah pemulai apai indai lemai nya


Jambatan Gantung SK Ng Entabai


Indai Margareta, Rh Sujang Kerangan Buluh Julau