Seiti Saup Ngangkat & Ngerembai ka Jaku Iban

1. Forum Jaku Iban 2011

Forum Jaku Iban ti bepun ari Surat Penabur Berita Utusan Borneo (Borneo Post) udah bekau nerima penemu ari Tan Sri William Mawan maya sida ti bisi nemuai ngagai opis Menteri Pembangunan Sosial dan Urbanisasi Sarawak bulan enam nyin suba.

Komiti Forum Jaku Iban tu pan lalu ditumbuh betuai ka Tn. Hj. Wan Zain Wan Madzar ari Majlis Permufakatan Ibu Bapa Malaysia Wilayah Sarawak (MAPIM) seduai En. Edwin Jemat ari Utusan Borneo.

Bala raban komiti bukai ari sekeda gerempung NGO mega dikanggau begulai ngatur pengawa tu ti disukung penuh ari Kementerian Pembangunan Sosial dan Urbanisasi Sarawak (KPSU).

Forum Jaku Iban tu disadang mantai ka enda kurang ari 4 iti Kertas Jurai ari bala ti landik nulis sereta ngajar dalam Jaku Iban ari UPSI, UITM, UNIMAS, Opis Pelajar, Tun Jugah Foundation enggau Majlis Adat Istiadat.

Nitih ka berita ari Komiti Pengatur Pengawa, Sapit Kepala Menteri Sarawak, YB Datuk Patinggi Tan Sri Dr. Alfred Jabu Anak Numpang orang ti ngepun mai ngangkat ka Jaku Iban di sadang dikangau bejadi ka Forum Jaku Iban kena 17.9.2011 tu ila.

2. Pekit Ngarang Cherita Pandak (Cherpan) enggau Berita Pandak (Berpan)

Serimbai enggau Forum Jaku Iban tu ti deka diadu kena 17/9/2011 ila, siti Pekit Nulis Cherita Pandak (CHERPAN) enggau Berita Pandak (BERPAN) mega deka diatur dikena nambah sereta ngangkat ka jaku Iban lebih agi ba nembiak rebak baru.

Tuju Pekit Ngarang

Komiti Pengatur Pengawa udah berunding deka besaup ngangkat sereta terus mantu ngerembaika Jaku Iban ngagai bala nembiak sereta bala mayuh kena:-

1 Nambahka utai ti dibacha ba Jaku Iban,

2 Nyediaka palan alai mansut ka berita, runding sereta penemu ngena Jaku Iban,

3 Nelebaka diri nulis dalam Jaku Iban,

4 Meransang nulis ka sekeda cherita enggau berita ti bisi nyadi ba sekeda alai diau.

Atur Pekit Ngarang Cherita & Berita Pandak

Sekeda ari pekara ti nyadi lalau Pekit Ngarang dalam Jaku Iban:-

1 Pekit ngarang tu dibuka ngagai semua nembiak ti berumur antara 13 – 18 taun kena 16/9/2011,

2 Semua karang mesti dalam Jaku Iban ti ngena Sistem Sepil Jaku Iban ti dikena ba sekula,

3 Pemanjai karang siti-siti cherita/berita antara 1200-1500 leka jaku,

4 Semua Cherita & Berita mesti dikarang diri empu lalu nadai kala udah ditulis orang bukai,

5 Semua Cherita enggau Berita enda tau disalin ari jaku bukai,

6 Cherita enggau Berita ditulis ngena computer lalu disempulangka enggau nama, No. Talipaun sereta No. IC pengarang/pemekit,

7 Semua karang mesti dianjung ngena Hardcopy sereta CD ngagai Komiti Pekit sebedau jam 5 lemai kena 5 September 2011 ngagai Opis SDNU Kuching (En. Spencer Birai 010-8320433) tauka Opis Utusan Borneo Kuching,

8 Pemutus Pekit Ngarang, Nama enggau Batang Karang deka diayan ba Utusan Borneo enggau Borneo Post,

9 Semua CHERPAN enggau BERPAN mega nyangka deka dipansutka ba Utusan Borneo bepanggai ba pemanah karang enggau berita,

10 Pemutus bala Hakim/Pemeresa nadai ulih dibantah,

11 Pemekit ti menang ba numbor 1, 2 & 3 deka dikangau ngulu Forum Jaku Iban (Makai/Ngirup/tambang bas/Ekpres/alai diau mega ditanggung Komiti Forum Jaku Iban),

12 Seiku Pemekit dikemendar nganjung satu/dua iti karang, seiti karang ba CHERPAN tauka seiti karang ba BERPAN,

13 Bala kaban belayan ti semak/bala diri sebilik Kaban Komiti pekit ditagang masuk pekit tu,

14 Komiti Pekit deka nyediaka DUA BENGKAH (2 Categories) Perais, CHERPAN & BERPAN ti sama penyampau:-

(i) Pemekit ti No. 1 deka nerima mata duit RM1,000.00, Tropi & Sijil,

(ii) Pemekit ti No. 2 deka nerima mata duit RM750.00, Tropi & Sijil,

(iii) Pemekit ti No. 3 deka nerima mata duit RM500.00, Tropi & Sijil,

(iv) Pemekit ti No. 4, 5, 6, 7, 8, 9 &10 deka nerima Pengaga Ati mata duit RM100.00 & Sijil,

(v) Semua Pemekit kelimpah ari 1 ngagai 10 deka nerima Sijil Masuk Pekit

Batang Cherita & Batang Berita (Topic)

Bala pemekit tau milih siti karang ba siti Bagi:-

A Bagi Cherita Pandak (CHERPAN)

(i) Cherita Lama/Jerita Tuai
(ii) Cherita Gaga/Ensera
(iii) Cherita Anak Mit

B Bagi Berita Pandak (BERPAN)

(i) Sekeda Pengawa ti nyadi ba menua pesisir/nengeri

(ii) Berita Pemansang Rumah Panjai/Menua/Pelajar/Bumai Bekebun/Ekonomi/Main Asal

(iii) Berita Pemansa Rampa Menua/Palan Temuai
(iv) Berita Pemujur enggau Penanggul sida ti nyadi Tuai
(v) Berita Pemujur Nembiak ba pelajar sekula/dagang/kontrak

3. Pengerami Makai Malam

Pengerami makai Malam deka diatur alai ngenatai ka Perais ka bala ti menang ba Pekit Ngarang Cherita enggau Berita Pandak.

Ia deka diatur lemai 17.9.2011 serimbai enggau kitai ti nyambut Hari Malaysia sereta ngenatai ka terima kasih (appreciation) ngagai semua ti datai ngulu Forum Jaku Iban.

Pengerami lemai nya mega di kena ngenatai ka pemadu besai terima kasih ngagai YB Datuk Patinggi Tan Sri Dr. Alfred Jabu Anak Numpang ti bejadi Forum Jaku Iban enggau Tan Sri William Mawan Anak Ikom ti nadai semimit belampung ati meri lalau enggau penemu ngatur forum tu.

Pekara silik pasal Forum Jaku Iban enggau Pekit Ngarang sereta Pengerami Makai Malam tau betanya terus ngagai;-

1. En. Churchill Edward (Borneo Post) 019-8279067
2. En. Spencer Birai (SDNU HQ) 010-8320433


CDA